ИЗДАВАЊЕТО ВИКЕНДИЦИ Е КРИВИЧНО ДЕЛО, ЌЕ ПРАВИМЕ ЗАСИЛЕНИ КОНТРОЛИ ЗА НОВОГОДИШНАТА НОЌ, НАЈАВИ СПАСОВСКИ

    ИЗДАВАЊЕТО ВИКЕНДИЦИ Е КРИВИЧНО ДЕЛО, ЌЕ ПРАВИМЕ ЗАСИЛЕНИ КОНТРОЛИ ЗА НОВОГОДИШНАТА НОЌ, НАЈАВИ СПАСОВСКИСпасовски рече дека во првите 100 дена од новата влада имаат поднесено над 250 кривични пријави за неспроведување на мерките. (Фото: МВР/Фејсбук)

    Министерот за внатрешни работи Оливер Спасовски најави дека полицијата ќе врши засилени контроли од наредната недела, но и во текот на новогодишната ноќ, одговарајќи на новинарско прашање на денешната прес-конференција по повод 100 дена влада. Тој појасни дека не е кривично дело ако се изнајми викендица на едно семејство, но е кривично дело против здравјето и животот на граѓаните ако се изнајмува на групи на луѓе.

    „Во овие моменти имаме сериозно ширење на вирусот и жртви од вирусот. Еден од заклучоците беше и во однос на издавање викендици на луѓе кои се организираат во групи. Нема никаква забрана за издавање викендици на семејства и едно семејство да може да биде во некоја викенд куќа каде било на територијата на нашата земја, меѓутоа секако дека е кривично дело издавање викендица на групи на луѓе. Не е идејата да донесеме одлука дека рестораните, хотелите итн. не можат да работат после 18 часот, се со цел да помогнеме во спречувањето на ширење на коронавирусот, а од друга страна да отвораме нови такви објекти, да ги имаме и во околината на Скопје, претежно во Сопиште, Маврово, Охрид, Струга или во кое било туристичко место. Зошто би била забраната за рестораните и хотелите ако тоа некои може да го прават во викендиците? Ние сериозно работиме, имаме оперативна акција во однос на издавањето на викендици и веќе постапуваат колегите. Превентивно реагираме уште сега до издавачите на викендици да знаат што ги очекува. Изготвени се сите планови за контроли, тоа веќе ќе го правиме од наредната недела и во текот на новогодишна ноќ“, кажа Спасовски.

    Спасовски рече дека во првите 100 дена од новата влада имаат поднесено над 250 кривични пријави за неспроведување на мерките.

    „Имаме разбивање на групи, затворање на ресторани, растурање на семејни веселби и свадби, тоа се процесуира до јавното обвинителство и се постапува“, рече министерот за внатрешни работи.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира