Пред локалните избори во 2013 година, тогашната владејачка ВМРО-ДПМНЕ собирала меници од кандидатите за градоначалници, открија бомбите за случајот „Титаник“ на СЈО, кои денеска се пуштаат како докази за злосторничко здружување и поткуп при избори, нелегално финансирање во изборна кампања и други кривични дела за кои се обвинети 21 лице, вклучувајќи и половина од бившото раководство на чело со Никола Груевски.

Во телефонски разговор од 2013 година, непознато лице збори со обвинетиот Миле Јанакиески. Миле му вели да ги земе мениците и да ги однесе во штабот на ВМРО-ДПМНЕ: „Чуј се со Дејан. Земи ги мениците и однеси ги во штабот“.

Соговорникот му кажува на Миле дека стигнал во штабот. Го прашува каде да ги остави мениците, на што Миле му одговара: „Остави ги на портирница кај Билјана Бришкоска“.

Потоа имаше разговори околу финансирањето во кампањата. Јанакиески го прашува лицето: „Може ли да се префрлат пари од донации од партиска сметка, на сметка на партијата отворена за изборите? Колку точно може? А според Изборниот законик, колку може да донираат правни, а колку физички лица?“

Во следниот разговор, Јанакиески кажува дека нашле решение за парите и оти работата е готова.

С. К. ДЕЛЕВСКА