Битолскиот актер Васко Мавровски синоќа бил викнат на 40-минутен службен разговор во полиција по пријава на министерката за култура Бисера Костадиновска-Стојчевска за вознемирување на Фејсбук, па пуштен – со усно предупредување.
Објавата за која што е пријавен Мавровски, кој патем е портпарол на локалната ВМРО-ДПМНЕ, е следниов:
„Еве на четириесет и некоја дознав дека квалитетот на културните настани се мери со заштеда на електрична енергија. Дали ваквите неадекватни изјави се должат на нивото на ПМ радиоактивни вдишани честици од воздухот во Битола или блискиот контакт со гранде шефо на РЕК-о Васко Ковачевски, од кој очекувам во скоро време на сите ‘штедачи’ по метро и пол продолжен кабел да ви подари (повеќенаменски)? Бисера Костадиновска Стојчевска претстава НОЌЕ без светло не се игра!“.
По овој пост за кабелот на подарок, Костадиновска-Стојчевска го пријавила Мавровски во полиција.
Од МВР за САКАМДАКАЖАМ.МК потврдија дека вчера во 21 часот, во врска со поплака, со покана било повикано лицето В.М.(41) од Битола. В.М. е предупреден во врска со поплаката, вели Министерството.
С. К. ДЕЛЕВСКА
