Министерството за животна средина (МЖСПП) им ги одзеде ингеренциите на Општината Свети Николе и градоначалникот Дејан Владев за управување со јавното претпријатие кое треба да раководи со идната регионална депонија, која треба да се гради кај селото Мечкуевци и шесте претоварни станици, откако тој и Општината одбија да соработува на тој проект.
Живка Михајлова, координаторка на проектот од Источниот Плански Регион, во којашто учествуваат 18 општини од Источниот и Североисточниот Плански Регион, за МИА вели дека со одлуката на Министерството продолжува постапката за ставање во функција на претпријатието, избор на директор, вработени и со тоа имплементација на проектот.
„Ингеренциите на Општина Свети Николе во поглед на одлуки поврзани со регионалната депонија се одземени од страна на Министерството за животна средина и просторно планирање. Во рамките на оваа постапка Свети Николе таму не донесува одлуки, во нивно име донесува Министерството, а сите други Општини нормално си ги донесуваат одлуките како што налага целиот процес. Таа локација не беше избрана туку-така, туку беше правена цела студија за изводливост, па така таа се прифати“, вели Михајлова.
Од Министерството очекуваат тендерската постапка за избор на компанија да заврши до крајот на годинава, а од наредната да се започне со градба. Од таму велат дека урбанистичко-планската документација е изработена и е во фаза на проверка во МЖСПП, по што ќе се достави на одобрување во Министерството за финансии и Делегацијата на Европска унија, со што ќе се создадат услови за распишување тендер.
Македонија доби кредит од 55 милиони евра од Европската банка за обнова и развој со што треба да продолжи воспоставувањето современ систем за управување со отпад во целава земја, процес кој е закочен речиси цела деценија. Кочењето на изведбата на овој проект беше нотиран и во последниот Извештај за Македонија за 2022 година на Европската Комисија, која побара од македонските власти да се посветат на целосно остварување.
