Ние зборуваме со внимание и пријателство и затоа сме различни од вас, ѝ рече премиерот Зоран Заев на пратеничката од ВМРО-ДПМНЕ Рашела Мизрахи одговарајќи на нејзиното пратеничко прашање денеска во Собранието.
Мизрахи од собраниската говорница, покажувајќи слики од нејзиното семејство и народни херои, му рече на Заев дека тие биле депортирани во логорот во Треблинка и мачени и убивани од бугарскиот фашистички окупатор, за кој таа рече дека Заев го нарекол администратор во Македонија и го праша на кој јазик зборува.
Премиерот Заев ѝ одговори дека е Македонец, кој зборува македонски јазик и токму на македонски јазик се обратил во говорот пред Европскиот парламент.
„Можам да бидам десет пати поквазипатриот од вас и да се удирам во гради, но мојот народ така ќе остане во ова сивило на Балканот, а нема да биде дел од Европа. Затоа јас ќе зборувам со европски зборови, со пријателство и внимание, а не како вас. Токму затоа сме различни во политиките. Никогаш не сум рекол дека Бугарија била администратор, туку дека во одреден период бугарската администрација се приклучила на Третиот Рајх“, рече Заев.
А. АНТЕВСКА
