На првпат објавена видео снимка од камера на ТВ Сител, Александар Кирацовски, Благоја Бочварски, Петре Шилегов, Максим Димитриевски, Љупчо Николовски, Дамјан Манчевски, Горан Мисовски, Зоран Заев и обезбедувањето се раскрвавени, но застанати пред Зијадин Села, Талат Џафери, Сурија Рушити, Реџаил Исмаили, кои се притиснати во ќош.
Толпата се разидува, остануваат 30-тина лица внатре, добар дел од нив со качулки. Мавањето со железни предмети продолжува, внатре се и дел од обвинетите за обид за убиство на Села.
Цело време тука е Игор Југ, кој е во притвор, но не за нападот врз Села. Тој не фрла, не удира, но фатен за појасот одзади со десната рака, прави бавни движења упатени кон повредените и прави простор. Дотука најмногу повреден е Зоран Заев. Му тече крв од расцепеното чело, му се пика во устата.
Максим Димитриевски повреден, во еден момент се подава кон Заев. Летаат фотељи, шипки, сталаци, тие исплашени се прегрнуваат.
Бившиот пратеник од ВМРО ДПМНЕ Александар Флоровски вика на сет глас, ги одвраќа насилниците. До него е пратеникот Влатко Ѓорчев, кој јаде ќотек заедно со пратениците од СДСМ. Со раширени раце се обидува истовремено и да фаќа од некој од фрлените сталаци.
Оваа снимка во судницата во Основниот суд Скопје 1 завршува со кадар во кој Села е зашеметен, но сѐ уште е тука и сѐ уште е на нозе.
С. К. ДЕЛЕВСКА
