НАД 100 ПРЕТСТАВКИ ЗА РАЗРЕШУВАЊЕ СУДИИ ПРЕД СУДСКИОТ СОВЕТ, МЕЃУ НИВ И ЗА ПРЕТСЕДАТЕЛОТ НА ВРХОВНИОТ СУД ВАНГЕЛОВСКИ

    НАД 100 ПРЕТСТАВКИ ЗА РАЗРЕШУВАЊЕ СУДИИ ПРЕД СУДСКИОТ СОВЕТ, МЕЃУ НИВ И ЗА ПРЕТСЕДАТЕЛОТ НА ВРХОВНИОТ СУД ВАНГЕЛОВСКИНајмногу иницијативи за разрешување има од Советот за утврдување факти и покренување постапка за утврдување одговорност за судија, кој беше укинат од Собранието на 11 јануари. - Од седница на Судскиот совет (Фото: СДК.МК)

    Рекордни 110 претставки за разрешување на судии ќе се најдат пред членовите на Судскиот совет од четврток натаму, дознава САКАМДАКАЖАМ.МК од судски извори. Иницијативи за разрешување се насобрале најмногу од Советот за утврдување на факти за разрешување на судии, кој по укинувањето му ги предал на претседателот на Судскиот совет Зоран Караџовски, но имало и нови претставки.

    Според она што го дознаваме, од позвучните имиња, три претставки од Специјалното јавно обвинителство и уште неколку од адвокати и други странки во постапките имала судијката Моника Бахчовановска. Натаму, пред Судскиот совет се наоѓаат и иницијативите за разрешување на кривичната петорка од Врховниот суд на чело со претседателот Јово Вангеловски, натаму на Рахилка Стојковска, Ристо Катавеновски, Фаик Аслани и Џемали Саити. Тие како кривичен совет, со гласови 3:2 го ослободија од притвор тогаш избеганиот бизнисмен Сеад Кочан, кој е обвинет во предметот на СЈО под кодно име „Труст“.

    Едниот од двајцата судии кои тврдат дека гласале против одлуката Кочан да се брани од слобода, очекува Судскиот совет да оди до крај за овој случај и да има одлука, а не да ја отфрли иницијативата. Судијата вели дека единственото место каде законот им дозволува на судиите да кажат како гласале при носење одлуки е токму Судскиот совет.

    Дека постојат толкав број претставки за нестручно и несовесно работење на нивни колеги, судиите со кои разговаравме, првпат слушаат. Тие претпоставуваат дека има и такви кои се за ситни неправилности, па намерно биле закочени во Советот за факти. Според стариот закон, немаше опција за дисциплинска мерка и парични казни за судиите што направиле помали грешки во работата.

    За в четврток Судскиот совет закажал седница на која ќе се определат овластени подносители на иницијативи за разрешување, од завршените и незавршените постапки што му ги даде Советот за факти пред распуштањето. Овие подносители ќе бидат од редот на членовите на Судскиот совет и ќе предлагаат судии за разрешување од функцијата, сè до стапувањето во сила на измените на Законот за Судски совет.

    Првите претставки против судии ќе се најдат на дневен ред веќе в четврток, зад затворени врати.

    С. К. ДЕЛЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари