НАМАЛУВАЊЕТО НА МАРЖАТА МОЖЕ ДА ПРИНУДИ ОДРЕДЕНИ ТРГОВЦИ ДА ПРЕСТАНАТ ДА ПРОДАВААТ ГОРИВА, ПРЕДУПРЕДУВА „МАКПЕТРОЛ“

    НАМАЛУВАЊЕТО НА МАРЖАТА МОЖЕ ДА ПРИНУДИ ОДРЕДЕНИ ТРГОВЦИ ДА ПРЕСТАНАТ ДА ПРОДАВААТ ГОРИВА, ПРЕДУПРЕДУВА „МАКПЕТРОЛ“„Макпетрол“ вели дека компаниите што снабдуваат нафта и нафтени деривати „не можат врз себе да го понесат товарот на вештачко држење на ниска цена на горивата, како социјална категорија“. (Фото: К. Попов)

    Намалување на маржите за трговија со горива од 4,5 на три денари, односно за 33 отсто, со одлука на Регулаторна комисија, претставува историски најниска маржа за трговците и создаде непазарни услови кои ќе доведат до криза со снабдувањето со нафта и нафтени деривати, велат од „Макпетрол“.

    Оттаму додаваат дека имајќи ја предвид нагласено тесната поврзаност на редовната испорака на горивата со нормалното функционирање на општеството, постои сериозен ризик за целосна блокада на економијата, не само на краток, туку и на подолг рок. Од „Макпетрол“ предупредуваат дека ваквото намалување на маржата може да принуди одредени трговци да престанат да продаваат гориво, а тоа е опција која што и тие сериозно ја разгледуват.

    „Ваквите мерки, кои што регулаторната комисија за енергетика и водни услуги на РСМ и останатите институции ги носат без никаква консултација со трговците, во овој случај тие со нафта и нафтени деривати, се несоодветни на глобалната криза од која што особено се зафатени компаниите што се занимаваат со снабдување гориво. Овој сектор изминативе недели веќе работи со загуба поради несоодветната методологија за пресметка, што доведува набавните цени да се повисоки од постоечката малопродажна. Со дополнителното намалување на маржите, загубите ќе бидат огромни. Укажуваме дека тоа може да принуди одредени трговци да престанат да продаваат гориво, а тоа е опција која што и ‘Макпетрол’ сериозно ја разгледува“, соопштија од нафтената компанија.

    „Макпетрол“ вели дека компаниите што снабдуваат нафта и нафтени деривати „не можат врз себе да го понесат товарот на вештачко држење на ниска цена на горивата, како социјална категорија“.

    „Станува збор за обврска на државата и на сите мерки што ѝ стојат на располагање, но не на сметка на пазарната логика и приватните компании. Оваа популистичка мерка е неодржлива и може да создаде дополнителна паника меѓу граѓаните, зголемена побарувачка и недостиг на гориво“, се вели во соопштението на „Макпетрол“.

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира