Постигнат е напредок за најголемиот дел од прашањата во спорот за името со Грција, останува да се дефинира опсегот на употребата и името за меѓународна употреба, рече премиерот Зоран Заев на денешниот отворениот брифинг со медиумите. На брифингот, присуствуваа и министерката за одбрана и вицепремиер Радмила Шекеринска и Бујар Османи, вицепремиер за европски прашања.
„Би кажал само дека не е решен опсегот и не е решено името за меѓународна употреба. Многу сме блиску до решение што би требало да биде и потврдено во делот идентитетот и во делот на националноста и на јазикот. Мислам дека сме пред решение за овие прашања“, изјави Заев.
За забелешките на Грција за иредентизмот, Заев вели дека треба само да се изнајдат формулации дека немаме територијални претензии, дека немаме намера да се мешаме во внатрешните работи на Грција.
Премиерот Заев најави дека референдум за името ќе има, а прашањето е дали ќе биде веднаш по евентуалниот договор со Грција, или пред влез на Македонија во НАТО или во ЕУ.
За опсегот на употреба и грчкото барање за ерга омнес, ставот на Македонија во преговорите е дека договореното име треба да биде само за меѓународна употреба без промена на Уставот, затоа што домашната употреба на името нема никакво влијание врз Грција.
За прашањето за идентитетот, Заев рече дека Грција има разбирање бидејќи станува збор за лично чувство и определба и не алудира на промена.
„Тоа е прашање на чувство и грчката страна има разбирање за оваа работа. Премиерот Алексис Ципрас и министерот Никос Коѕијас имаат разбирање за идентитетот. Идентитетот е чувство и не алудираат на промена на идентитетските прашања“, рече Зеав.
Државјанството, како што кажа Заев , ќе биде според новото име што ќе биде за меѓународна употреба.
„Би било веројатно граѓанин на Северна, Горна, Вардарска, или слично, тоа што ќе го одлучиме, плус Македонија. Јас очекувам да бидат потврдени прашањата што се веќе и опишани во графите на Обединетите Нации , како што е македонскиот јазик, со тоа што апсолутно сме подготвени да ги отстраниме сите нивни резерви за некакво алудирање на наследство или слично, заради тоа што немаме намера со потврда на нашиот уставен јазик, македонскиот јазик да навлегуваме во наследството на Грција“, потенцираше премиерот Заев.
Секое решение меѓу Македонија и Грција што ќе биде договорено, треба да биде ратификувано од Парламентите на двете земји.
Г. ТРПЕНОСКИ
