Никој на нашите соседи не може да им го одземе правото да се нарекуваат Македонци, изјави грчкиот министер за надворешни работи Никос Коѕијас во интервјуто за грчката новинска агенција АНА-МПА, а го пренесе МИА.
Тој вели дека на ниеден народ не може да му се наметне како ќе се самоопределува.
„Граѓаните на оваа земја имаат право да се самоопределуваат и тоа е универзалното право, што не можеме да го смениме. Ние можеме да ги нарекуваме како сакаме и на официјално ниво ќе се користи името Република Северна Македонија“, кажа Коѕијас, додавајќи дека условите конечно биле зрели да се реши ова прашање.
За Коѕијас, договорот од Преспа е компромис, во кој и двете страни направиле отстапки.
„Грција не го освоила северниот сосед, па да му наметнува и диктира нешто што ние го сакаме. Ако ништо не се прашуваше другата страна, тогаш можевме да ја викаме и Северна Алјаска, а не Северна Македонија. Сакаме и другата страна да ја убеди својата јавност, да го добие референдумот, да го смени уставот и да донесе тешки одлуки“, вели Коѕијас.
