Министерот за здравство Венко Филипче кажа дека засега не се планира враќање на рестриктивните мерки бидејќи овој бран на заболени од КОВИД-19 настанал кога тие биле на сила. За ова прашање било дискутирано и на состанкот на Комисијата за заразни болести и на Кризниот штаб на Владата и сега засега, таа мерка не е во игра.

„Ние дискутиравме дали рестрикција е нешто што може да придонесе за паѓање на бројката за новозаболени. Но, и овој бран почна од моментот кога имаше мерки и секое ново олабавување ќе значи нов бран. Засега не доаѓа во предвид воведување на рестрикции, но не можам да ја исклучам можноста“, рече министерот Филипче.

По зголемиот број на новозаразени и полнењето на болничките капацитети, министерот Филипче кажа дека здравствените работници се веќе преморени и истоштени и уште еднаш ги замоли граѓаните да ги почитуваат мерките.

„На граѓаните денес сакам да им кажам само едно нешто, бидејќи мерките постојано ги кажуваме и сите добро ги знаат. Здравствените работници не се прибрани дома со месеци, работат за да го спасат секој живот и треба тоа да го почитуваме. Секој може да помогне само ако носи маска и држи дистанца. Ве молам да се почитуваат мерките, за да здивнат здравствените работници, оти тоа е единствена начин да се стави крај на кризата“, рече Филипче.

Денеска во земјава се регистрирани 193 нови случаи, од кои 140 се од Скопје.

А. АНТЕВСКА