Општина Центар денеска продолжи со акцијата за уривање на дивите тераси на кафулињата. Работници ангажирани од Општината во присуство на полиција, почнаа да ги отстрануваат терасите на улицата Ленинова. Иако вчера имало најава дека сопствениците сами ќе ги урнат нелегалните градби, тоа не го сториле сите, па затоа интервенира Општината. Сопствениците на едно кафуле утрово почнале сами ги отстрануваат тендите.
На улицата Ленинова има неколку нелегални тераси и како што велат од Општината една по една ќе се уриваат.
„Сопствениците на локалите отстапуваат од Правилникот за поставување на летни тераси. Дел од нив немаат одобрение за поставување на летна тераса, а дел имаат дозвола за одреден простор на пример икс метри јавна површина а зафаќаат двојно или тројно повеќе“, велат од Општина Центар.
Општината има издадено решенија за уривање на 16 летни тераси на кафулиња. Акцијата почна вчера со уривање на терасата на новото кафуле на Боемска улица.
А. АНТЕВСКА
