Поглаварот на Католичката црква Папата Фрањо на 7 мај ќе ја посети Македонија, соопшти денес Владата.

„Би сакале да ве известиме дека Неговата Светост Папата Франциск, прифаќајќи ја поканата на највисоките Власти на Државата и на Католичката Црква, ќе оствари Апостолско патување во Република Македонија, на 7 мај 2019 година, при што ќе го посети градот Скопје–родниот град на света Мајка Тереза. Програмата на посетата ќе биде објавена благовремено“, се вели во владиното соопштение.

Претходно, Папата Фрањо од 5 до 7 мај ќе ги посети Софија и Раковски во Бугарија.

Премиерот Зоран Заев со сопругата Зорица, министерот за внатрешни работи Оливер Спасовски и тогашниот министер за култура Роберт Алаѓозовски на 25 мај годинава беа на аудиенција кај Папата Фрањо.