Попладнево, поради густа магла пак нема слетувања на Меѓународниот аеродром Скопје и дел од летовите се откажани. После 16 часот не слета авионот на „Сан експрес“ од Анталија, како и авионите на „Визер“ од Меминген и Баден Баден. Летот од Меминген беше пренасочен кон Приштина, а од Баден Баден во Софија. Авионот на „Лот“ од Варшава исто ТАКА не успеа да слета на Скопскиот аеродром и се врати назад кон Полска.
Досега се откажани летовите за Малме и Истанбул.
Според податоците од аеродромските метеостаници, видливоста е од 200 метри. Според прогнозата на Управата за хидрометеоролошки работи (УХМР), во Скопје и утре ќе биде променливо облачно, наутро со магла и претежно тивко.
Пореметувања на авиосообраќајот на скопскиот аеродром имаше и на 2 и 7 јануари кога заради густа магла беа откажани неколку летови.
Поради конфигурацијата на теренот, Скопскиот аеродром е ограничен на Категорија 1 и не може да добие прекатегоризација во Категорија 2 со што би се намалиле минимумите за слетување при намалена видливост. Од Министерството за транспорт и врски велат дека ограничувањата за слетување при намалена видливост не се поради неесоодветна опрема, туку поради теренот каде што се наоѓа аеродромот во Скопје.
А. АНТЕВСКА
