Антивладиниот протест во Скопје заврши невообичаено рано. Демонстрантите си заминаа од пред Владата на Република Македонија околу 20 часот, откако полицијата не им дозволи да се движат кон Уставниот суд. Откако се обидоа да се нагодат со полицајците на мостот „Гоце Делчев“, тие фрлија боја врз лавовите на мостот.

Откако скандира „Пуштете го народот!“ демонстрантите се откажаа од намерата да го минат мостот и се вратија назад на просторот пред Владата.  Протестот беше мирен. Репортерите на СДК.МК забележаа дури и поздравување помеѓу полицајците и демонстрантите.

Демонстрантите што ги организира граѓанската иницијатива Протестирам од пред зградата на Специјалното обвинитeлство (СЈО) сакаа преку мостот Гоце Делчев да стигнат до Уставниот суд, како „еден од симболите на неправда и корумпираност“.

Веќе дванаесетти ден демонстрантите бараа повлекување на одлуката за аболиција на политичарите против кои се води истрага и против кои е покренато обвинение од Специјалното јавно обвинителство (СЈО), итна и неотповиклива оставка на претседателот Ѓорге Иванов, произнесување на Уставниот суд за уставноста на СЈО, формирање специјално одделение на Кривичниот суд, кое ќе биде надлежно за случаите под јурисдикција на СЈО, итно повлекување на одлуката за одржување на парламентарни избори на 5 јуни, задолжително вклучување и присуство на независни претставници на граѓанското општество во процесот на решавање на кризата и, формирање на преодна влада која докрај ќе ги имплементира итните реформски приоритети од извештајот на Прибе.

Уставниот суд на 16 март повторно му ја врати можноста на претседателот да помилува осуденици за изборни нерегуларности, педофили, наркодилери, како и лица осудени за дела против човечноста.

Претседателот Ѓорге Иванов ја искористи одлуката на Уставниот суд. На 12 април донесе одлука да помилува 56 политичари и нивни соработници против кои се води истрага, или се под сомневање дека сториле криминал кој произлегува од содржината на прислушуваните разговори.