Советот на јавни обвинители почнува постапка за разрешување на притворената Катица Јанева од функцијата шефица на Специјалното јавно обвинителство. Претседателот на Советот на јавни обвинители Коле Штериев, по денешната седница изјави дека едногласно е одлучено оти се исполнети сите услови за започнување на постапка за разрешување на Специјалната обвинителка Јанева.

„За да го направиме тоа, Советот треба да изготви извештај со утврдена фактичка состојба и да го достави до Собранието, за тоа согласно своите надлежности ја продолжи постапката. Мислам дека во текот на денешниот ден ќе го спремиме извештајот и најдоцна до утре ќе го доставиме до Собранието“, рече Штериев.

Во извештајот, како што кажа Штериев, ќе бидат наведени податоци кои ќе бидат доволни пратениците да имаа пред себе факти за да одлучуваат.

Тој не сакаше да коментира дали со разрешување на Катица Јанева Советот на јавни обвинители ќе назначи в.д. Специјален обвинител, велејќи дека Јанева уште не е разрешена од функцијата.

Јанева е во 30-дневен притвор, како една од тројцата осомничени во случајот „Рекет“, задно со Бојан Јовановски-Боки 13 и Зоран Милески-Кичеец.

А. АНТЕВСКА

.