СПАСОВСКИ МУ ПРЕДЛОЖИ НА СОБРАНИЕТО ДА ЈА РАЗРЕШИ МИЗРАХИ

    СПАСОВСКИ МУ ПРЕДЛОЖИ НА СОБРАНИЕТО ДА ЈА РАЗРЕШИ МИЗРАХИМинистерката за труд и социјала Рашела Мизрахи и премиерот Оливер Спасовски на последната владина седница (Фото: Влада)

    Техничкиот премиер Оливер Спасовски побара од пратениците во Собранието да ја разрешат техничката министерка за труд и социјална политика Рашела Мизрахи. Предлогот на Спасовски е утрово доставен до собраниските служби и сега треба да биде ставен на дневен ред на наредната седница.

    „За сѐ може да има компромис, но, за непочитување на Уставот нема компромиси. Ако опозицијата мисли дека ситнопартиски интереси се поважни од иднината на државата, се лаже. Предлогот е веќе доставен до Собранието и предлагам да биде разрешена заради тоа што мора да се почитува Уставот и Законот“, рече Спасовски на денешната прес-конференција во Владата за фотоволтаици.

    Министерката Мизрахи и вчера одржа прес-конференција во Министерството за труд и социјална политика пред табла со името Република Македонија. Ставот на Мизрахи е дека таа табла ја затекнала во Министерството кога ја презела функцијата, и оти пред неа и во минатото поранешната министерка Мила Царовска одржувала средби.

    Министерот за надворешни работи Никола Димитров во неделата побара од премиерот Спасовски да ја разреши Мизрахи бидејќи не го почитува Договорот од Преспа и заради тоа што добил вербална нота од Грција.

    А. АНТЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари