ТАТКО НА УБИЕНО МОМЧЕ КАЈ СМИЛКОВСКО ЕЗЕРО ПОБАРА СТРАЖАРНО ПРИВЕДУВАЊЕ НА ЗАЕВ И ПРЕТРЕС НА СЕДИШТЕТО НА СДСМ

    ТАТКО НА УБИЕНО МОМЧЕ КАЈ СМИЛКОВСКО ЕЗЕРО ПОБАРА СТРАЖАРНО ПРИВЕДУВАЊЕ НА ЗАЕВ И ПРЕТРЕС НА СЕДИШТЕТО НА СДСМГоран Наќевски, татко на убиениот Александар Наќевски, утринава пред Основниот суд Скопје 1. (Фото: СДК.МК)

    Горан Наќевски, татко на едно од убиените момчиња кај Смилковско езеро, побара од судијата Огнен Ставрев стражарно да го приведе премиерот Зоран Заев затоа што како политички противник на ДУИ им изнел конкретни докази за вмешаност на функционери од ДУИ во свирепото убиство. Таткото, под морална и кривична одговорност, изрази желба, неповикан, на денешното судење за предметот „Монструм“ да даде изјава и судијата Ставрев му дозволи.

    Во изјавата, тој го обвини Заев дека сега откако се склучи коалицијата со ДУИ тој манипулира со доказите кои што можат да доведат до вистината за „Монструм“.

    „Кога бевме кај Заев рече дека ќе ни даде 6 разговори државна тајна за 6 функционери на ДУИ. Но, подоцна тие станаа 5. ДУИ тогаш беше нивни противник. Заев ни ги покажа транскриптите, ни го посочи Невзат Бејта и ни покажа транскрипт од разговор меѓу Невзат Бејта и обвинетиот Фејзи Азири. Не го исполни ветувањето, од политички причини не ни ги даде тие 5 државни тајни“, рече Наќевски.

    Тој продолжи, во име на сите родители: Бараме претрес да се изврши во моментов во седиштето на СДСМ. Тврдам дека тие транскрипти се таму. Бараме да не соочите со премиерот Заев, дека не лажеме и не измислуваме. Стражарно приведете го, ќе го почекаме.

    Судот не се изјасни за барањата на родителите на убиените деца. Судењето е одложено за 15 мај, зашто обвинетиот Фејзи Азири се разболел. Родителите остро реагираа на тоа. Стана обвинителката Фатиме Фетаи и забележа дека нема комплетна документација за разболениот обвинет како доказ. Судијата Огнен Ставрев им вети на револтираните родители во судницата: „Ви ветувам одиме до крај, брзо ќе дојдеме до вистината. Од вас барам само да ми помогнете и да бидете уште малку трпеливи“.

    На 24 ноември минатата година, Врховниот суд ги укина пресудите на Апелациониот и Основниот суд Скопје 1 за предметот „Монструм“ и го врати случајот на повторно судење. Со ваквата пресуда на Врховниот суд беа уважени жалбите на осудените за петкратното убиство кај Смиљковско Езеро, што се случи на 12 април 2012 година.

    С. К. ДЕЛЕВСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира