ТРИ ГОДИНИ НЕ СЕ ПРЕСАДУВААТ БУБРЕЗИ ОД ПОЧИНАТ ДАРИТЕЛ

    ТРИ ГОДИНИ НЕ СЕ ПРЕСАДУВААТ БУБРЕЗИ ОД ПОЧИНАТ ДАРИТЕЛГодинава се направени 4 трансплантации на бубрег, а овој месец се планирани уште две. Д-р Гоце Спасовски (лево), д-р Оливера Стојчева Танева, и Душко ѓорѓиев, претседател на „Нефрон“ (Фото:СДК.МК)

    Кадаверична трансплантација на бубрези, или пресадување бубрег од мртов дарител нема трета година, а годинава направени се четири трансплантации од жив дарител и за овој месец планирани сè уште две.

    Членовите на здружението на бубрежно болни „Нефрон“ апелираа до надлежните да почнат национална кампања за развој на дарувањето органи, бидејќи околу 170 пациенти кои претходно се типизирани и на кои им се направени потребните испитувања на Клиниката за нефрологија сè уште чекаат орган.

    „Апелираме до надлежните да почнат со националната кампања за донирање, бидејќи претходно за две години беа направени 15 успешни трансплантации од мртов дарител. Со трансплантацијата се заштедуваат средства што секоја година се трошат за овие пациенти за дијализа, а од друга страна квалитетот на животот на самите пациенти е многу подобар“, вели Душко Ѓорѓиев, претседател на „Нефрон“.

    Д-р Гоце Спасовски, од клиниката за нефрологија, кажа дека по прекинот на трансплантациите што настана во 2015 и 2016 година, кога тогашниот министер за здравство Никола Тодоров сакаше центарот за трансплантација од Клиниката за урологија да го префрли во градската општа болница „8-ми септември“, повторно е воспоставена редовна динамика на пресадување бубрези и дека годишно се прават меѓу 20 до 30 трансплантации од жив дарител, односно секој месец најмалку по две.

    Тој кажа дека без поголема национална кампања и медиумска поддршка за развој на дарувањето органи, тешко ќе можат повторно да ја заживеат кадаверичната трансплантација, бидејќи најчесто семејството не дава согласност да се земат органите од пациент со мозочна смрт.

    „Тука улога треба да одигра и Националниот координатор за трансплантација. За да можеме да влеземе во европската мрежа за размена на донирани органи ’Еуротрансплант‘, покрај другите услови треба годишно да имаме најмалку 10 дарители на органи на милион жители, односно 20 дарители годишно или 40 пресадени бубрези. Кадаверичната трансплантација е предуслов за да влеземе во ’Еуротрансплант‘. Исто така треба да се обезбеди и авион со кој веднаш ќе биде донесен органот од некоја европска земја доколку влеземе во оваа мрежа, оти ако тој стигне 20 часа по мозочната смрт не сме сигурни дека органот ќе биде во ред“, вели д-р Спасовски.

    Д-р Оливера Стојчева Танева, од Клиниката за нефрологија, кажа дека за разлика од мажите помалку жени што имаат бубрежна болест се на дијализа и кај нив подоцна се развива терминалната фаза, бидејќи естрогениот хормон ги штити од брз напредок на болеста.

    Во Македонија има 1.600 пациенти кои се во краен стадиум од хроничната бубрежна болест, од кои 1.350 се на дијализа, а 250 се со трансплантиран орган. Секоја година 300 нови пациенти почнуваат со дијализа, од кои 170 се мажи, а 130 жени.

    Годинава Светскиот ден на бубрезите се одбележува во ист ден со Меѓународниот ден на жената 8 март.

    Е. БОЧВАРОСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари