Министерот за образование и наука Арбер Адеми најави дека во соработка со УНИЦЕФ и Бирото за развој за образование се подготвува прва национална веб-платформа за далечинско учење, која ќе биде ставена во функција од утре.
Платформата е наречена е-училница, а линкот до неа е www. eduino.gov.mk. На неа ќе се прикачуваат видеолекции за сите задолжителни предмети од основно и средно образование, кои ќе траат по 15 минути, а ќе бидат придружени со презентација и нарација од наставниците.
„Јасно е дека образовните установи нема да бидат отворени и учебната година нема да продолжи во училниците во скоро време. Но, тоа не значи дека треба да ја прекинеме учебната година во оваа вонредна состојба“, рече Адеми на прес-конференција, објавувајќи ги новите мерки од Уредбата која беше донесена на вчерашната владина седница. Сите воспитно-образовни институции, студентски домови и научни институти се затворија на 10 март поради ширењето на коронавирусот. Претседателот Стево Пендаровски прогласи вонредна состојба до 18 април.
До сите училишта во земјава се доставени подготвени формулари и упатства за лекции, и веќе пристигнуваат лекции. Стигнати се пријави за над 1.000 лекции, а досега се стигнати 400. Лекциите се проверуваат од содржински аспект и се внимава да не се повторуваат.
„Во мое име, и во име на инстиуциите, ве молам за трпеливост и конструктивност во начинот на функционирање на платформата“, рече Адеми.
На новинарски прашања како ќе се одвива електронското учење во области каде нема интернет, или во семејства во кои нема смарт-уреди, министерот кажа дека од Министерството за информатичко општество и администрација е информиран дека целата земја е покриена со Интернет.
„Кога зборуваме за е-учење, не мислиме на некакви најсовремени камери или микрофони, туку наставата ќе може да се следи преку смарт-уреди. Верувам дека не би имале некој посебен проблем за да се реализира, но секако стоиме на располагање и апелирам да се пријавуваат проблемите“, одговори министерот.
Во однос на начинот на оценување, Адеми кажа дека Бирото за развој веќе подготвува упатства за сите наставници и ќе бидат навреме известени.
„За полагањето на државна матура и уписите на факултет, ќе кажам дека внимателно ја следиме ситуацијата и зависно од околностите ќе преземаме чекори. Роковите, датумите за полагање се предвидени со календар за организирање на учебната година. Нема простор за паника и вознемиреност, дај боже час поскоро да заврши оваа состојба и ќе има и полагање и уписна сесија во високообразовните институции“, изјави министерот Адеми.
Б. НЕСТОРОСКА
