Пожарот во реонот на Пехчево, Делчево и Берово, со кој стотици луѓе се бореа повеќе од една недела, конечно е локализиран, додека низ земјата утрово имаше три активни пожари. Од Центарот за управување со кризи (ЦУК) информираа дека пожарникарите, вклучувајќи ги и странските, остануваат на терен со цел да не дојде до повторно разгорување на огнот.
Од активните пожари, оној во Општина Сарај, кај селата Раовиќ и Буковиќ, прави проблеми веќе неколку дена поради непристапниот терен и последните информации кажуваат дека се префрлил на ловиштето Јасен.
„Пожарот се држи под контрола. На тој терен дејствуваше и хеликоптер на АРМ“, кажа Марија Милкова од ЦУК.
Пожарот во Општина Петровец кај село Дивје е со намален интензитет и се држи под контрола, исто како и оној кај прилепското село Топлица.
Г. КОНЕВ
