Три дена Владата е без фиксна телефонија затоа што се расипала телефонската централа. Интерната комуникација помеѓу министрите и службите, како и обезбедувањето последните три дена користи мобилни телефони.
Дефектот се сервисира, потврди за САКАМДАКАЖАМ.МК генералниот секретар на Владата Драги Рашковски.
„Точно е дека се расипа телефонската централа во Владата и сервисерите го поправаат дефектот. Работат и денеска. Се работи за централа стара 25 години и нема делови за неа. Дефектот, според сервисерите, е во напојувањето на централата“, вели Рашковски.
Рашковски одговори дека немало никаква штета во нормалното функционирање на службите во Владата, а ни во комуникацијата, бидејќи сите вработени, како и владините функционери, имаат мобилни телефони. Комуникацијата, вели тој, секако, во најголем дел е по електронска пошта.
За денеска било најавено дека централата ќе проработи.
