Во текот на неделава во здравствените домови низ земјата ќе бидат дистрибуирани 11.520 дози на вакцини против ковид-19, соопшти Министерството за здравство. Во Скопје, вакцинацијата ќе се одвива во поликлиниката „Бит пазар“. Вакцините се наменети за возрасни и за адолесценти над 12 години.
„Потсетуваме дека вакцинацијата претставува најдобра и најефикасна мерка на заштита на здравјето од заразни заболувања“, велат од Министерството.
Според последниот извештај за ковид-19 на Институтот за јавно здравје (ИЈЗ), во периодот од 30 септември до 6 октомври тестирани се 255 материјали, со намалување од 25,2% во однос на претходната недела, кога биле 341. Регистрирани се 20 нови позитивни случаи, со намалување од 55,6% во однос на минатата недела.
Во тековната недела регистрирани се заболени лица во пет града. Најголем дел од нив се во Скопје (14), а највисока инциденца е регистрирана во Неготино. Регистрирани се заболени лица во возрасни групи над 30 години и од нула до девет години, а најголем број случаи има во возрасната група над 60 години (14/70,0%).
Во текот на минатата недела (30.09-06.10) пријавено е едно починато лице асоцирано со ковид-19 од Скопје, од возрасната група над 60 години. Лицето било невакцинирано, без регистрирани коморбидитети и починало во болнички услови.
Во текот на 2024, заклучно со 6 октомври, регистрирани се 1.689 заболени. Во септември (288) се регистрира намалување од 65,3% во споредба на претходниот месец (829).
„Иако бројот на заболени од ковид-19 на неделно ниво се намалува, со оглед на тоа дека почнува периодот на зголемена циркулација на респираторни вируси во северната хемисфера, постои ризик активноста на САРС-КоВ-2 да се зголемува, што ја нагласува континуираната потреба од надзор (епидемиолошки и вирусолошки) на национално и регионално ниво“, препорачува ИЈЗ.
