Здружението на јавните обвинители на Република Северна Македонија денеска остро реагираше на отвореното писмо од јавниот обвинител Вилма Русковска, упатено ноќеска преку медиумите до странски амбасади и до меѓународните организации, загрозена како што наведе, од силни притисоци врз неа и Обвинителството, по влегувањето да врши претрес на 18 јули во Финансовата полиција.
„Како професионално здружение, со зачуденост го проследивме дописот за кој сметаме дека го нарушува угледот на јавнообвинителската функција и грубо го прекршува Етичкиот кодекс на јавните обвинители. Имено, како јавни обвинители не гледаме ниту една причина за ваков драматичен полноќен повик до меѓународни институции и дипломати, особено што ниту обвинителката Русковска, ниту останатите обвинители од Основното јавно обвинителство за гонење на организиран криминал и корупција во ниту еден момент не биле спречени самостојно да водат истраги за предмети во нивна надлежност“, наведе Здружението.
Меѓутоа, при постапувањето во предметите, и обвинителите од организиран криминал како и сите останати јавни обвинители, мора да се водат од начелата на законитост и правичност, смета Здружението.
„Освен тоа, Јавното обвинителство е засновано на принципите на хиерархија и субординација, што значи дека секој јавен обвинител за својата работа одговара пред повисокото обвинителство. Ниту еден јавен обвинител не смее да се смета себе си за семоќен и да одбива контрола над постапувањето. Таквата контрола токму има за цел да се избегне незаконито постапување и самоволие, како и да се гарантира праведноста на постапката.
Јавното обвинителство имало и има капацитети и институционални можности да ги преземе сите неопходни дејствија и апсолутно независно да одлучува во секој еден предмет, без притоа да има потреба од надзор од амбасади или меѓународни организации“, е реакцијата во соопштението.
С. К. ДЕЛЕВСКА
