Основното јавно обвинителство Скопје разби мрежа за ограбување на пензионери преку брзи кредити, кои ги подигале 43 лица меѓу кои и вработен во Фондот за здравство, крадејќи ги потписите на  граѓаните депонирани таму.

„ОЈО Скопје денеска поведе постапка против вкупно 43 лица кои со различни дејствија на компјутерски измами, фалсификување исправи и злоупотреба на лични податоци учествувале во повеќекратни измами на граѓани со брзи кредити. За четворица од осомничените, меѓу кои и едно службено лице од Фондот за здравствено осигурување, е поведена истрага за кривични дела – Фалсификување исправа од член 378, Злоупотреба на лични податоци од член 149, Компјутерска измама од член 251-б од Кривичниот законик, додека останатите се опфатени во постапката со поединечни дејствија на помагање и соизвршителство во секој од случаите поединечно“, вели Обвинителството.

Истрагата опфаќа криминал со брзи кредити кој осомничените го почнале во 2022 година. Тогаш САКАМДАКАЖАМ.МК го почна серијалот со сведочења на оштетени граѓани, кои тврдеа дека на нивно име некој зема брзи кредити, а ним им доаѓаат сметки од финансиски друштва и од извршители, со суми од 40.000, 50.000, 70.000 и повеќе илјади денари, да ги платат како знаат.

По серијалот написи, тогашниот министер за финансии Фатмир Бесими го смени Правилникот за одобрување т.н. брзи кредити, со тоа што финансиските друштва веќе не можеа да префрлуваат пари само со едно телефонско јавување и со потпис испратен по електронска пошта.

„Во текот на предистражната постапка, Обвинителството во координација со МВР-СВР Скопје обезбедило обемен доказен материјал дека почнувајќи од јули 2022 година, дел од осомничените, спротивно на условите утврдени со закон и без согласност на граѓаните, користеле туѓи лични податоци, правеле лажни јавни исправи и преправале вистински јавни исправи со намера таквите исправи да се употребат како вистински. Со внесување невистинити податоци во информатичките системи на десетина различни друштва за брзи кредити, како и со фалсификување на електронски потписи, без знаење на оштетените на нивно име земале кредити, создавајќи им обврска на лицата да ги враќаат наводно позајмените средства“, наведува Обвинителството.

Друг дел од осомничените, лажирале податоци за вработување на невработени лица, прикажувајќи ги како вработени и кредитоспособни, па врз основа на тие податоци од кредитните друштва извлекувале пари кои потоа биле ненаплатливи. Во тоа им помагал и осомничениот – службеното лице вработено во Фондот за здравствено осигурување на РСМ, ставајќи им средства на располагање, односно ЕЗБО-број кој претходно го обезбедувал преку својот компјутер од електронскиот систем на Фондот.

„Ваквите лажни податоци лицата ги користеле за да подигнат и по неколку кредити од различни друштва во еден ден, со што прибавувале значителна имотна корист. Потоа парите ги извлекувале од сметка и во најголем дел ги давале на осомничените организатори на вакви измами. Незаконски прибавената имотна корист од сите вакви дејствија во вкупен обем надминува три милиони денари“, вели Обвинителството.

• НЕМА ВЕЌЕ БРЗИ КРЕДИТИ БЕЗ ФИЗИЧКО ПРИСУСТВО, МИНИСТЕРОТ БЕСИМИ КОНЕЧНО ДОНЕСЕ ПРАВИЛНИК ЗА ЗАШТИТА ОД ИЗМАМИ СО УКРАДЕНИ ЛИЧНИ КАРТИ
• ГОЛЕМ БРОЈ ФИНАНСИСКИ ДРУШТВА ВМЕШАНИ ВО МАСОВЕН ГРАБЕЖ ПРЕКУ БРЗИ КРЕДИТИ СО УКРАДЕНИ ПОДАТОЦИ ОД ЛИЧНА КАРТА, 65 ПРИЈАВИ ВО МВР ЗА САМО 7 МЕСЕЦИ
• НОВ ШОК ЗА СЕМЕЈСТВОТО НА ЛИЦЕТО СО ЦЕРЕБРАЛНА ПАРАЛИЗА, ДОБИ ОПОМЕНА ПРЕД ТУЖБА СО КОЈА СЕ БАРА ЗА БРЗ КРЕДИТ ОД 18.641 ДЕНАР ШТО ИЗМАМНИЦИ ГО ЗЕЛ НА НЕГОВО ИМЕ, ДА ПЛАТИ 67.515 ДЕНАРИ
• НОВА ЖРТВА НА ИЗМАМИТЕ СО БРЗИ КРЕДИТИ СО УКРАДЕНИ ЛИЧНИ КАРТИ, МЕДИЦИНСКА СЕСТРА ОД СКОПЈЕ ТРЕБА ДА ВРАТИ 163.000 ДЕНАРИ КРЕДИТ ШТО ДРУГ ГО ЗЕЛ НА НЕЈЗИНО ИМЕ

Јавниот обвинител до судијата за претходна постапка од Основниот кривичен суд Скопје ќе достави предлог за определување мерка притвор за тројца од осомничените опфатени со наредбата за истрага, додека четвртиот веќе се наоѓа во притвор во постапка за друго кривично дело.

С. К. ДЕЛЕВСКА