Претседателот на ФИФА, Џани Инфантино, се повлече од контроверзниот план за продажба на удели во натпреварувањата на светската куќа на фудбалот на приватни инвеститори, откако предлогот наиде на општо негодување и отпор од водечките фудбалски конфедерации.

Првиот човек на светскиот фудбал кажа дека проектот довел до длабоки поделби кои веќе не му служат на првичниот концепт. Поради тоа, спорната иницијатива нема да продолжи понатаму. Инфантино најави дека во наредниот период ќе се обиде да ги врати сите засегнати страни на преговарачка маса во дух на заеднички интерес за фудбалската игра.

Предлогот предвидуваше формирање на посебна комерцијална подружница – „ФИФА форвард ентерпрајз“, каде што надворешни инвеститори би имале можност да купат малцински удели. Како дел од планот, на 211 земји членки им беа понудени по 40 милиони долари доколку дадат поддршка за инвестицискиот проект во кој беа опфатени машките и женските Светски првенства. Пред предлог-документот да биде повлечен, американската инвестициска фирма „Трајв етернал“ се споменуваше како водечки кандидат за преземање на инвестицијата.

Проектот брзо предизвика криза откако Европската фудбалска унија (УЕФА) изгласа бојкот на Светските првенства доколку планот се спроведе. На отпорот му се придружија Конкакаф и Азиската фудбалска конфедерација (АФЦ), поддржувајќи го ставот дека иднината на глобалниот фудбал мора да се гради преку соодветни консултации и почит кон поставените управувачки структури.

Внатрешните превирања во организацијата дополнително се продлабочија со оставката на Карлос Кордеиро, виш советник за глобална стратегија, кој предупреди дека таквиот потег го заложува идниот развој на фудбалот. За да поминеше предлогот на Инфантино, беше потребна поддршка од најмалку 106 членки. Меѓутоа, со заедничкиот фронт на УЕФА, Конкакаф и АФЦ, кои заедно располагаат со 136 гласа, усвојувањето на планот стана речиси невозможно, што го доведе претседателот на ФИФА под сериозен притисок пред изборите за нов мандат закажани за следниот март.