Со чартер-лет на „Кроација ерлајнс“, македонската фудбалска репрезентација утрово отпатува за Романија, на три дена до почетокот на Европското првенство, што ќе се игра во 11 држави. Фудбалерите и стручниот штаб од Скопскиот аеродром ги испрати премиерот Зоран Заев.

Репрезентацијата отпатува со чартер-лет на „Кроација ерлајнс“ (Фото: Фејсбук)

Првите два меча Македонија ќе ги игра во Букурешт, а историското деби ќе се случи в недела од 18 часот. Првиот противник ни е Австрија и селекторот Игор Ангеловски ќе може да смета на сите свои избраници, откако на последното тестирање немало позитивни на коронавирус во репрезентацијата.

На 17 јуни Македонија игра против Украина, а потоа се сели во Амстердам, каде што на 21 јуни го има последниот дуел од Ц-групата со Холандија.