Организаторите му го одзедоа првото место на најдобриот кинески долгопругаш Хе Жи на полумаратонот во Пекинг минатиот викенд, откако истрагата потврди дека уште тројца тркачи ја намалиле брзината за да му дозволат да победи на трката. Сите четворица тркачи беа дисквалификувани и мораа да ги вратат медалите и паричните награди.

Кинеските онлајн корисници го споделија видеото од последниот момент од трката поради сомневање дека е наместена. Снимката покажа дека тројца африкански тркачи му дозволуваат на Хе, најдобриот кинески тркач на долги патеки, да се движи пред нив непосредно пред да стигнат до целта. Тројцата тркачи намерно го намалија темпото, се вели во соопштението на комитетот формиран да ја испита трката. Хе заврши со време од 1 час, 3 минути и 44 секунди, што беше повеќе од една минута побавно од кинескиот рекорд на полумаратон.

Специјалниот комитет соопшти дека четворица тркачи првично биле ангажирани како пејсмејкери од спонзор, но дека главните организатори на трката не го знаеле тоа. Еден од пејсмејкерите не ја заврши трката. Во соопштението не се признава дали трката била наместена, но организаторот се извини.