СЕ ПОСРАМОТИВМЕ ДО КОСКА ПРОТИВ ФУДБАЛСКО ЏУЏЕ – ГЕРМАНСКИТЕ МЕДИУМИ ЖЕСТОКО ЈА КРИТИКУВААТ РЕПРЕЗЕНТАЦИЈАТА ПО ПОРАЗОТ ОД МАКЕДОНИЈА

    СЕ ПОСРАМОТИВМЕ ДО КОСКА ПРОТИВ ФУДБАЛСКО ЏУЏЕ – ГЕРМАНСКИТЕ МЕДИУМИ ЖЕСТОКО ЈА КРИТИКУВААТ РЕПРЕЗЕНТАЦИЈАТА ПО ПОРАЗОТ ОД МАКЕДОНИЈАЕлиф Елнас го слави победничкиот гол во 85. минута (Фото: Ројтерс)

    „Ова е како да сме го освоиле Европското првенство“, изјави селекторот на македонската фудбалска репрезентација Игор Ангеловски по вчерашната историска победа над Германија од 2:1 во Дуизбург во третото коло на квалификациите за Мундијалот во Катар во 2022 година.

    Расположението во спротивниот табор е сосема спротивно, па најтиражниот германски весник „Билд“ му порача на четирикратниот светски првак дека е подобро да не игра на претстојното ЕП.

    „Не мора ни да играме на Европското првенство ова лето. Со патетичен настап, германскиот национален тим се посрамоти себеси до коска и изгуби со 1:2 од Северна Македонија. Да, од Северна Македонија! Фудбалско џуџе, 65. селекција на светската ранг-листа успеа да направи четирикратниот светски првак да изгледа смешно“, пишува „Билд“.

    Македонија истовремено ја прекина низата на Германија од 35 натпревари без пораз во квалификациите за светските првенства, што траеше од 2001 година, кога изгуби од Англија.

    „Тешко е да се објасни ова. Игравме добро во првите 20 минути, но ако веќе не знаеш да дадеш гол, барем потруди се да не го примиш. Нешто не штимаше тука“, изјави германската фудбалска легенда Ули Хенес како коментатор на „РТЛ“.

    Весникот „Франкфуртер алгемајне цајтунг“ вели дека поразот од Македонија звучи како првоаприлска шега, ама не е.

    „Ова беше горчлива фудбалска реалност. Националниот тим мора да објасни како се случи овој срам“.

    По три одиграни кола, Македонија е втора во групата Ј со шест освоени бода, пред Германија.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира