Европскиот првак Вардар направи огромен чекор кон нов пласман на завршниот турнир на Лигата на шампионите во Келн, откако на гостински терен го совлада ракометниот гигант Кил со 29:28 на првиот натпревар од четвртфиналето.

Пред повеќе од 10.000 навивачи на Кил, вардарци не само што не потклекнаа на притисокот, туку во поголемиот дел од средбата имаа и водство, додека на голот голем придонес даде Арпад Штербик.

Последни во напад тргнаа домашните ракометари, но на крајот се радуваа „црвено-црните“. По едно погрешно проигрување, топката заврши во аут, а Хорхе Македа бргу реагираше и буквално во последната секунда го погоди небранетиот гол на Кил.

Чупиќ, Стоилов и Мораеш, инаку поранешен пикер на Кил, постигнаа по пет гола за Вардар.

Реваншот се игра в недела во „Јане Сандански“, со почеток во 17 часот.