Приказната на Кометал Ѓорче Петров останува неповторена.

Ракометарките на Вардар не ја искористија и својата последна шанса да се закитат со титулата европски првак, откако во драматичното финале на завршниот турнир на Лигата на шампионите во Будимпешта загубија од Ѓер со 26:27, и тоа по дополнителни десет минути игра.

И ова не е само крај на еден сон, ова е крај и на најамбициозното и најуспешно поглавје во историјата на клубот, бидејќи овој тим на Вардар целосно се растура на крајот на сезоната. Сите ракометарки веќе имаат пронајдено нов клуб, а Вардар ќе има еден сосема друг изглед наесен и нема да биде веќе никаков фактор ни во Лигата на шампионите, ни во европскиот ракомет.

Вардарки прокоцкаа голема шанса во регуларните 60 минути, примајќи гол на десет секунди до крајот, а неверојатното промашување на Чанаџија во завршните моменти од продолженијата и дефинитивно го остави овој ѕвезден тим без европска титула.

Ѓер е првата екипа која успеала да ја одбрани титулата откако се играат завршни турнири, а вардарки за пет години впишаа три трети и две втори места.