Два деца се убиени, а девет се ранети во денешниот напад со нож во работилница за танц во англискиот град Саутпорт близу Ливерпул. Шест од ранетите деца се во критична состојба, исто како и двајца возрасни, објави полицијата.

Нападот го извршил 17-годишник, кој е уапсен и обвинет за убиство и за обид за убиство. Полицијата кажа дека не се бараат други лица во врска со овој напад, кој не се смета за терористички.

„Истрагата е во рана фаза и засега не е познат мотивот на овој трагичен инцидент“, соопшти полицијата на Ливерпул.

Локалните медиуми објавија дека нападот се случил во детски клуб сместен во поранешно складиште.

„На часовите по танц и јога присуствувале деца на возраст од шест до десет години. Меѓу ранетите има многу деца, сцената беше ужасна“, изјави новинарот Тим Џонсон.