Министерот за финансии на САД, Скот Бесент, неодамна се преселил од својот дом во Вашингтон во американска воена база, откако биле упатени ирански закани по неговиот живот, изјавија две лица запознати со случајот. За ова прв објави весникот „Њујорк тајмс“.

Висок разузнавачки претставник во администрацијата на Доналд Трамп кон крајот на минатиот месец предупредил дека иранските заговори против американските функционери и граѓани влегле во напредна фаза.

Од август, Бесент ја предводи кампањата на американски санкции и економски притисок врз Иран, наречена „Операција Економски отпадник“, со цел да се принуди Техеран да ги прекине нападите врз бродовите и повторно да го отвори Ормускиот Теснец.

„Министерот нема да биде обесхрабрен од заканите на иранскиот режим и останува посветен на спроведувањето на ‘Операцијата Економски отпадник‘ и одржувањето на блокадата, кои заедно ја уриваат иранската економија“, изјави портпарол на министерството за финансии на САД.

Иран претходно негираше дека планирал напади врз функционери и луѓе на американска територија. „Њујорк тајмс“ објави дека американски претставници посочиле оти способноста на Иран да изврши големи напади во САД и на други територии во странство е ограничена.