Летовите на американски дронови над Црното Море се знак за директна вмешаност на САД во конфликтот со Русија, изјави портпаролот на Кремљ, Дмитриј Песков. Минатата недела, американско беспилотно летало падна во морето откако беше пресретнато од руски борбени авиони „су-27“, што беше првата позната директна воена средба меѓу двете страни откако Русија ја започна војната во Украина минатата година.

„Сосема е очигледно што прават овие беспилотни летала, а нивната мисија воопшто не е мирна мисија за осигурување безбедна пловидба во меѓународните води. И всушност, зборуваме за директно вклучување на операторите на овие дронови во конфликтот, и тоа против нас“, ја пренесе агенцијата Интерфакс изјавата на Песков во ТВ интервју.

САД рекоа дека руските авиони го малтретирале дронот во инцидентот во вторникот и го испрскале со гориво пред еден од нив да му го скрати пропелерот и да предизвика тој да падне додека бил на извидувачка мисија во меѓународниот воздушен простор. Русија соопшти дека беспилотното летало ги прекршило ограничувањата на воздушниот простор и ја изгубило контролата откако нагло маневрирало. Рускиот министер за одбрана им додели награди на пилотите кои го соборија дронот, за возврат на обвинувањата на САД дека инцидентот покажал непромисленост и можна неспособност на пилотите.

Москва вели дека САД и нивните сојузници ја користат Украина за да водат војна против Русија и да ѝ нанесат „стратешки пораз“. Вашингтон вели дека ѝ помага на Украина да се одбрани од неиспровоцираната руска инвазија.