Американската асоцијација на психоаналитичари се извини што во минатото ја третирала хомосексуалноста како ментална болест, додавајќи дека тоа придонесло за дискриминација и за трауми на ЛГБТИ-луѓето.

Ова е првпат една американска здравствена институција или организација да издаде вакво извинување.

Иако психијатрите престанаа да ја класифицираат хомосексуалноста како нарушување уште во 1973 година, а психоаналитичарите речиси две децении подоцна, Асоцијацијата вели дека не ѝ е познато дека некоја професионална група досега се извинила.

„Крајно време е да ги признаеме нашата улога во дискриминирањето и траумите што ги има предизвикано нашата професија и да кажеме ‘Ние се извинуваме‘“, изјави претседателот на Асоцијацијата, д-р Ли Џаф.

Тој го прочита извинувањето на стартот на нејзината 109. годишна средба во Сан Диего и доби овации од повеќе од 200 присутни.

„Секогаш е тешко да се признае дека некој грешел. Мислам дека ова беше вистински момент да се направи тоа“, додаде Џаф.

Токму оваа Асоцијација стана еден од првите поддржувачи на истополови бракови и се противеше на контроверзната „конверзивна терапија“.