Американскиот потпретседател Џеј-Ди Венс денеска изјави дека неговиот преговарачки тим го напушта Пакистан откако не постигна договор со Иран по 21-часовни преговори, со што се загрозува кревкото двонеделно примирје.

„Лошата вест е дека не постигнавме договор и мислам дека тоа е лоша вест за Иран многу повеќе отколку за Соединетите Американски Држави“, изјави Венс за новинарите по завршувањето на разговорите. „Значи, се враќаме во САД откако не постигнавме договор. Многу јасно ставивме до знаење кои се нашите црвени линии.“

Венс ги наведе недостатоците во разговорите и рече дека Иран одлучил да не ги прифати американските услови, меѓу кои и да не создава нуклеарно оружје. „Треба да видиме позитивна посветеност дека нема да бараат нуклеарно оружје и нема да бараат алатки што ќе им овозможат брзо да се здобијат со нуклеарно оружје. Тоа е основната цел на претседателот на САД и тоа е она што се обидовме да го постигнеме преку овие преговори“, рече Венс и набргу потоа замина од Исламабад.

Полуофицијалната иранска новинска агенција Тасним соопшти дека „прекумерните“ барања на САД го попречиле постигнувањето договор и дека преговорите завршиле. Пред да зборува Венс, иранската влада во објава на X изјави дека преговорите ќе продолжат и дека техничките експерти од двете страни ќе разменуваат документи.

Портпаролот на иранското Министерство за надворешни работи изјави дека разговорите биле водени во атмосфера на недоверба. „Природно е што не требаше да очекуваме да постигнеме договор само за една сесија“, изјави портпаролот, цитиран од иранските медиуми.

Претседателот на иранскиот парламент, Мохамед Багер Галибаф, кој ја предводеше делегацијата на Иран во преговорите во Пакистан, вели дека сега е време САД „да одлучат дали можат да ја заслужат нашата доверба или не“. Во објава на X, Галибаф вели дека пред преговорите нагласил оти Иран имал „добра волја“, но поради искуствата од двете претходни војни „немал доверба во спротивната страна“. Тој вели дека иранската делегација „покренала иницијативи насочени кон иднината, но спротивната страна на крајот не успеала да ја добие довербата на иранската делегација во оваа рунда преговори“. Тој додаде: „Ние ниту за момент нема да ги прекинеме нашите напори за консолидирање на достигнувањата од четириесетте дена национална одбрана на Иран“. Рече дека преговорите биле „интензивни“ и му се заблагодари на Пакистан за олеснување.

Пакистанскиот министер за надворешни работи, Ишак Дар, изјави дека е „императив“ да се одржи двонеделното примирје што беше договорено во вторникот, додека двете страни се обидуваа да ја смират војната што започна на 28 февруари со воздушни напади на САД и Израел врз Иран.

„Императив е страните да продолжат да ја почитуваат својата посветеност на прекинот на огнот“, рече пакистанскиот министер за надворешни работи, Ишак Дар, додавајќи дека неговата земја ќе се обиде да олесни нов дијалог меѓу Иран и САД во наредните денови.

Министерот за безбедност на Израел, Зеев Елкин, изјави за Армиското радио дека повеќе разговори се сè уште опција, но предупреди: „Иранците си играат со оган“.

Дискусиите во Исламабад започнаа вчера, неколку дена откако беше објавено кревкото примирје, додека војната во која загинаа илјадници луѓе, ги потресе глобалните пазари и ги зголеми глобалните цени на нафтата влезе во својата седма недела.

На својата кратка прес-конференција, Венс не го спомена повторното отворање на Ормускиот Теснец, пречка за околу 20% од глобалните енергетски резерви што Иран ги блокираше од почетокот на војната.

Американската војска соопшти дека два разорувачи го поминале Ормускиот Теснец, кој е под контрола на Иран, пред да започнат со работа за расчистување на мини, што е првпат откако започна војната. Сепак, иранските државни медиуми соопштија дека заедничката воена команда го негира тоа.

„Го чистиме теснецот. Дали ќе постигнеме договор или не, за мене не е важно“, изјави Трамп пред новинарите додека разговорите продолжуваа, а времето се приближуваше до 2 часот наутро во Исламабад. Тој ги нарече преговорите „многу длабоки“. Иранската државна телевизија забележа, како што ги нарече, „сериозни“ разлики.

Американскиот сојузник Израел, исто така, ги бомбардираше милитантите на Хезболах поддржани од Техеран во Либан и вели дека конфликтот не е дел од примирјето меѓу Иран и САД. Иран инсистираше дека борбите во Либан мора да престанат. Израелската војска соопшти дека ги погодила ракетните лансери на Хезболах во текот на ноќта помеѓу саботата и неделата, а црн чад можел да се види како се издига во јужните предградија на либанскиот главен град Бејрут во неделата. Во израелските села во близина на границата се огласија сирени за воздушни напади, предупредувајќи за дојдовен ракетен оган од Либан.

Преговорите меѓу Израел и Либан се очекуваат следната недела во Вашингтон. Израелскиот премиер Бенјамин Нетанјаху на 9 април изјави дека одобрил директни разговори, додека канцеларијата на либанскиот претседател Џозеф Аун на 10 април соопшти дека преговорите меѓу Израел и Либан се очекува да започнат на 14 април.

Разговорите во Исламабад беа првата директна средба меѓу САД и Иран по повеќе од една деценија и првата дискусија на највисоко ниво од Исламската револуција во 1979 година.

Во делегацијата на Венс беа специјалниот претставник Стив Виткоф и зетот на претседателот Доналд Трамп, Џаред Кушнер. Венс рече дека разговарал со Трамп шест до 12 пати за време на разговорите.

Во тимот на Иран беа претседателот на парламентот, Мохамед Бакер Калибаф, и министерот за надворешни работи, Абас Аракчи. Иранската делегација пристигна завчера облечена во црно во знак на жалост за починатиот врховен лидер, ајатолахот Али Хамнеи, и другите убиени во војната. Тие носеа чевли и торби на некои ученици убиени за време на бомбардирањето на училиштето до воен комплекс од страна на САД, соопшти иранската влада. Пентагон соопшти дека нападот е под истрага, но Ројтерс објави дека воените истражители веруваат оти САД веројатно се одговорни за него.

„Имаше промени во расположението од двете страни, а температурата се зголемуваше и намалуваше за време на состанокот“, рече пакистански извор во врска со првата рунда разговори. За време на разговорите меѓу САД и Иран, Исламабад, град со повеќе од 2 милиони луѓе, беше блокиран со илјадници паравоени лица и војници на улиците. Посредничката улога на Пакистан е извонредна трансформација за земја која пред една година беше дипломатски аутсајдер.