Бугарија повторно ја чекаат долги и тешки преговори за формирање коалиција, откако и петтите парламентарни избори за период од две години не дадоа јасен победник.

Блокот предводен од ГЕРБ на бившиот премиер Бојко Борисов освои 26,5% гласови на вчерашните избори, додека за прозападната реформистичка коалиција предводена од Продолжуваме со промената гласаа 24,9% избирачи, велат прелиминарните резултати засновани врз 96% пребројани гласови.

На третото место, со 14,4% гласови, е партијата Преродба, која му дава поддршка на Владимир Путин во војната со Украина, а прагот од 10% освоени гласови го надмина само уште Движењето за права и слободи (13%).

Долготрајниот политички ќор-сокак во Бугарија, предизвикан најмногу од личниот анимозитет помеѓу лидерите на двата главни блока, ја принуди земјата да го одложи влегувањето во еврозоната и сè уште го нема усвоено буџетот за оваа година. Во најголемиот дел од последните две години, Бугарија беше водена од технократски привремени влади, назначени од претседателот Румен Радев.