Чешката пејачка Хана Хорак, која била противник на вакцинирањето, почина откако намерно се заразила со коронавирусот за да може да добие здравствена пропусница и да посетува јавни места. Нејзиниот син Јан Рек изјави дека 57-годишната Хорак намерно се изложила на вирусот откако тој и татко му се заразиле пред Божиќ.

„Таа одлучи да продолжи да живее нормално покрај нас и преферираше да се зарази место да се вакцинира“, изјави Рек.

Во Чешка е неопходно да се покаже доказ за вакцинирање или прележан ковид-19 за влез во културни и спортски објекти, барови и ресторани, но и за да може да се патува.

Два дена пред да почине, Хорак напишала на Фејсбук дека имала интензивна борба со вирусот.

„Преживеав и сега за мене ќе има концерти, сауна, театар…“, напишала Хорак, пејачка во фолк групата „Асонанс“.

Рек го обвини локалното антиваксерско движење за смртта на мајка му.

„Тие ѝ го испраа мозокот и сега ја имаат нејзината крв на своите раце. Знам точно кој влијаеше врз неа. Тажен сум, зашто таа повеќе им веруваше на тотални странци отколку на своето семејство“, кажа Рек.