Во Канада е измерена највисоката температура досега, додека западот на земјата и Пацифичкиот Северозапад во САД се погодени од досега невидена жештина.

Температурата во гратчето Литон во Британска Колумбија се искачила до 46,6 Целзиусови степени, со што е соборен 84 стар рекорд, објавија официјални лица. Литон се наоѓа 250 километри североисточно од Ванкувер. Претходниот рекорд од 45 степени бил поставен во јули 1937 во два града во Саскачеван.

И САД и Канада ги предупредија своите граѓани на опасното ниво на жештина, што би можело да потрае цела недела. Зоната на висок притисок е огромна, од Калифорнија до канадските арктички територии.

Литон не е осамен случај. На повеќе од 40 други места во Британска Колумбија исто така се измерени рекордно високи температури.

„Сакам кога се уриваат рекорди, но ова е нивно уништување. Во делови од западна Канада е потопло отколку во Дубаи. Постои можност температурите да одат и до 47 степени“, вели климатологот Дејвид Филипс.

Во САД, најжешко е во сојузните држави Вашингтон и Орегон, каде што температурите исто така надминаа 40 степени.