Француските власти во северниот дел од земјата истражуваат дали излетувањето на патнички воз од шините во петок навечер било резултат на злонамерен чин.

Јавниот обвинител Себастијан Галоа во саботата соопшти дека на шините бил пронајден фрагмент од пруга, а причините за неговото присуство таму засега се непознати. Според извештаите на локалните медиуми, во возот кој сообраќал на линијата меѓу Руен и Каен во регионот Нормандија имало 186 патници.

Лекарска помош поради повреди им била укажана на 44 лица, меѓу кои и 18-годишна девојка која со хеликоптер била префрлена во болница во критична состојба.

Околу 140 пожарникари и други спасувачки тимови биле испратени на местото на инцидентот во близина на Клеон, јужно од Руен, нешто пред 20 часот.

Еден од патниците во возот, Луис, за радиото ИЦИ Нормандија раскажа дека одеднаш почувствувале неколку потреси кои по три секунди станале многу посилни. Тој додаде дека веќе не можел да се задржи на своето седиште, прозорците делумно се скршиле, а камења од шините навлегле во вагонот, дополнувајќи дека случката била крајно вознемирувачка.

Од обвинителството во Руен наведоа дека машиновозачот имал негативни резултати на тестирањата за алкохол и наркотици.