САД, Германија и Франција соопштија дека не ја признаваат независната Каталонија и дека нивниот единствен партнер останува шпанската влада.

Според портпаролот на германската влада, Штефен Зајберт, потегот на Каталонија претставува кршење на принципите на суверенитет и на територијален интегритет на Шпанија.

„Германската влада не ја признава оваа декларација за независност. Берлин има јасен став дека го поддржува премиерот Маријано Рахој во обидите да поврати мир и ред“, изјави Зајберт.

Слични изјави дојдоа и од Вашингтон и Париз.

„Каталонија е интегрален дел од Шпанија и САД ги поддржуваат владините уставни мерки за зачувување на силна и обединета Шпанија“, кажа портпаролката на Стејт департмент, Хедер Науерт.

„Единствениот соговорник на мојата влада и на мене лично во Шпанија е Маријано Рахој. Ние нема да се мешаме, затоа што ова е внатрешно прашање на Шпанија“, изјави францускиот претседател Емануел Макрон.