Околу 71 отсто од Европејците сакаат Европската Унија да формира своја армија, покажуваат резултатите од нова анкета. Истражувањето открива растечка загриженост за доверливоста на Вашингтон и длабоки поделби околу руската војна во Украина.
Извештајот „Трендови 2026“ на безбедносниот тинк-тенк ГЛОБСЕК утврди дека поддршката за сопствена армија на ЕУ е силна во сите анкетирани земји членки, при што највисока е во Романија со 82 отсто, по што следуваат Литванија со 78 отсто и Франција со 75 отсто.
Дури и во земјите кои традиционално се претпазливи кон европската одбранбена интеграција, мнозинството граѓани ја поддржале идејата. Околу 70 отсто од испитаниците во Полска и во Бугарија се за формирање армија на ЕУ, заедно со 69 отсто во Германија.
Наодите доаѓаат во време кога европските влади дебатираат како да ги зајакнат своите воени капацитети поради континуираната руска агресија и зголемената неизвесност околу посветеноста на Соединетите Американски Држави кон европската безбедност.
ГЛОБСЕК спровел анкета меѓу испитаници во 14 земји од трансатлантскиот простор, вклучувајќи 11 земји членки на ЕУ, Украина, Обединетото Кралство и САД.
Ентузијазмот за европските воени капацитети не се чини дека е отфрлање на НАТО. Околу 77 отсто од испитаниците во анкетираните земји членки на НАТО изјавиле дека би гласале за останување во Алијансата, додека 78 отсто од испитаниците во земјите на ЕУ го поддржуваат развојот на сопствените одбранбени капацитети на блокот паралелно со Алијансата.
Има силна поддршка и за најдиректната форма на придонес кон националната одбрана, задолжителниот воен рок. Меѓу испитаниците во земјите без задолжителна воена служба, 64 отсто се за нејзино повторно воведување, при што највисоки бројки се забележани во Чешка, Франција, Германија и Словачка.
Ставовите кон Вашингтон откриваат сè подлабок трансатлантски јаз. Повеќе од една третина од испитаниците низ анкетираните европски земји сега ги сметаат САД за безбедносна закана. Околу половина од испитаниците во Германија, Франција и Велика Британија го делат ова мислење, во споредба со приближно една третина во Централна и Источна Европа.
Германија е единствената анкетирана земја каде мнозинството граѓани ги сметаат САД за безбедносна закана.
Резултатите укажуваат на политички парадокс, гласачите сакаат посилна европска војска, но остануваат посветени на НАТО дури и кога довербата во неговата најмоќна членка опаѓа.
