Грција ќе им даде тригодишно даночно олеснување на сопствениците на куќи и станови кои наместо на кус рок ќе ги издаваат долгорочно, со што ќе стане последната европска земја што ги ограничи туристичкото издавање за да се справи со недостигот на станови.

Како дел од планот за справување со недостигот на станови, премиерот Киријакос Мицотакис минатата недела рече дека Грција, исто така, планира да го зголеми данокот за краткорочни изнајмувања и да забрани нови лиценци во центарот на Атина.

Краткорочниот бум на изнајмување во Европа веќе ги натера туристичките жаришта како што се шпанските Канарски Острови, Лисабон, Берлин и Фиренца да објават ограничувања на таквите дозволи, кои многу локални жители ги обвинуваат за кревањето на цените за постојаните жители.

Жителите на главниот град позитивно одговорија на плановите.

„Тоа е огромен проблем бидејќи го менува урбаниот пејзаж. Таму каде што има традиционални градби, сега има модерна до нив, дизајнирана да биде за издавање на Ербиенби“, вели 58-годишна жителка на Атина.

Валентина Реино, шефица на јавна политика за Ербиенби во Јужна Европа, вчера рече дека нејзината компанија е подготвена да соработува со грчката влада за „таргетирани и пропорционални решенија“.

Ниските плати, високата инфлација, недостигот на имот и растот на краткорочните изнајмувања за одмор ја поттикнаа станбената криза во Грција која сè уште се опоравува од речиси децениската должничка криза. Особено тешко се погодени лицата со ниски примања, младите парови и студентите. Грција досега потроши 2,2 милијарди евра за субвенционирање заеми со ниски камати за да им помогне на младите да купуваат имот и ќе одвои дополнителни 2 милијарди евра за проширување на планот за парови до 50 години.