Извршниот шеф на „Тесла“ Илон Маск ја доведе во прашање веродостојноста на тестовите за ковид-19, тврдејќи дека во ист ден прво имал два позитивни, а потоа два негативни теста.

„Се случува некоја измама. Денеска бев тестиран за ковид-19 четири пати. Тестот двапати беше позитивен, а потоа двапати негативен. Иста машина, ист тест, иста болничарка“, напиша Маск на Твитер.

Тој кажа дека правел брзи антиген тестови, а сега чекал резултати од ПЦР тестови од други лаборатории.

„Имам симптоми на типична настинка, ништо невообичаено досега“, вели Маск.

Американската Агенција за храна и лекови овој месец ги извести лабораториите и здравствените институции дека лажни позитивни резултати може да се појават кај брзите антиген тестови.