Иран го испрати својот одговор на предлозите на САД за прекинување на војната преку медијатори во Пакистан, јавуваат иранските државни медиуми. Иако деталите од одговорот не се објавени, се верува дека американските предлози се фокусирани на меморандум од 14 точки кој би можел да отвори пат за преговори околу нуклеарните амбиции на Техеран.

Според извештаите на американските медиуми, документот предвидува суспензија на збогатувањето нуклеарно гориво, укинување на санкциите и воспоставување слободен транзит низ Ормускиот Теснец. Многу од овие услови би биле дел од конечниот договор, иако висок член на иранскиот парламент претходно го отфрли предлогот опишувајќи го како листа на желби.

Примирјето кое треба да ги олесни разговорите за крај на конфликтот започнат од САД и Израел во февруари, во најголем дел се почитува и покрај повремените размени на оган. Сепак, Иран продолжува со блокадата на Ормускиот Теснец, што влијае на растот на цените на нафтата, додека САД спроведуваат поморска блокада на иранските пристаништа за да извршат притисок врз властите во Техеран.

Иранскиот претседател Масуд Пезешкијан изјави дека земјата никогаш нема да му се поклони на непријателот. Тој во објава на социјалните мрежи објасни дека зборувањето за дијалог или преговори не претставува чин на предавање или повлекување, туку целта е да се заштитат правата на иранската нација и да се одбранат националните интереси со решителна сила.

Американскиот претседател Доналд Трамп неделава повторно предвиде дека војната во Иран ќе заврши брзо, додавајќи дека неговата цел за запирање на нуклеарната програма на Техеран е јасна за јавноста.

Истовремено, воениот портпарол Мохамад Акраминија ги предупреди соседите да не соработуваат со американските санкции. Тој рече дека пловилата што минуваат низ Ормускиот Теснец ќе се соочат со тешки последици доколку не соработуваат со Иран и додаде дека американската флота нема да успее да воспостави целосна блокада во северниот дел на Индискиот Океан.