Новиот состав на грчкиот парламент денеска положи заклетва на верска церемонија, една недела по изборите на кои што Нова демократија оствари убедлива победа и освои силен мандат за самостојно владеење. Партијата на премиерот Кирјакос Мицотакис ќе има 158 пратеници, наспроти 48 на Сириза, која ќе добие нов лидер откако Алексис Ципрас поднесе оставка по тешкиот изборен пораз.
Една крајнолевичарска и три крајнодесничарски партии го надминаа прагот од 3% освоени гласови и само една од нив досега беше во парламентот.
Новата партија Спартанци освои 4,7% гласови и ќе има 12 пратеници. Таа доби поддршка од Илијас Касидијарис, поранешен висок функционер на забранетата Златна зора, кој беше затворен откако неговата нова партија беше дисквалификувана од изборите.
Ники или Победа има десет пратеници. Предводена од теологот Димитриос Нациос, оваа партија влече поддршка од групи на моќната Грчка православна црква, а слична позадина има и Грчка солуција, чиј лидер Кирјакос Велопулос е познат по емисиите за историски и верски теми на неговата регионална телевизија.
Партијата Премин кон слободата ќе ја претставува крајната левица во парламентот со осум пратеници. На нејзино чело се наоѓа поранешната пратеничка на Сириза, Зое Константопулу.
