Кралицата Елизабета Втора се согласи работата на британскиот парламент да биде суспендирана во септември, на само неколку недели до спроведувањето на брегзит.

Премиерот Борис Џонсон изјави дека кралицата Елизабета Втора ќе го одржи својот традиционален говор по суспензијата, на 14 октомври, за да „нагласи многу возбудлива агенда“. Тоа значи дека пратениците ќе имаат значително помалку време за да донесат закони кои би го спречиле излегувањето на Велика Британија од Европска Унија на 31 октомври без договор.

„Ова е навреда за демократските процеси, но нема да ги спречи пратениците да дебатираат за брегзит“, изјави спикерот на парламентот Џон Беркоу.

Лидерот на Лабуристите Џереми Корбин го опиша потегот како неприфатлив.

„Она што го прави премиерот е газење на демократијата за да го спроведе брегзит без договор“, кажа Корбин, кој најави дека ќе се обиде да се избори за гласање на доверба на Џонсон.

Затворањето на парламентот се случува кога премиерот така ќе ја посоветува кралицата.

„Не треба да чекаме да се спроведе брегзит за да почнеме да правиме планови за иднината на земјата. Ни требаат нови закони и затоа мора да одиме напред“, кажа Џонсон.