Исламска држава објави аудиоснимка, на којашто наводно зборува нејзиниот мистериозен лидер Абу Бакр ал-Багдади, кој за последен пат се огласи пред речиси една година.

Во својот 55-минутен говор, Багдади им порачува на поддржувачите на Исламска држава да издржат, и покрај тоа што групата претри големи загуби во Ирак и Сирија.

Иако автентичноста на снимката не може да се потврди, експерти велат дека гласот потсетува на оној од претходните снимки. Не е познато кога е снимена, но во неа се споменуваат некои скорешни настани.

Багдади, чиј син Худајфах беше убиен во Сирија минатиот месец, само еднаш беше виден во јавност, во ирачкиот град Мосул во јули 2014 година и во неколку наврати се тврдеше дека е убиен или повреден, што никогаш не беше потврдено.

Тој за последен пат се огласи во септември 2017 година, два месеца откако ирачките сили го зазедоа Мосул.

Исламска држава воено е поразена во Ирак и во поголемиот дел на Сирија, но Обединетите нации во својот извештај проценуваат дека таа сè уште има меѓу 20 и 30.000 борци.