Министрите за внатрешни работи и правда, Боштјан Поклукар и Андреја Катич, денеска поднесоа оставки, кои уследија по трагичниот настан во Ново Место, каде што 21-годишен припадник на ромската заедница претепа до смрт маж пред еден ресторан. Премиерот Роберт Голоб ги прифати оставките. Главниот раководител на полицијата, Дамјан Петрич, засега останува на функцијата.
Локалното население се чувствува сè понебезбедно поради она што се смета за пораст на криминалната активност кај членовите на ромската заедница.

Во ноќта од петокот кон саботата (24-25 октомври), еден маж бил брутално претепан пред ресторан во Ново Место, а подоцна им подлегнал на повредите. Полицијата уапсила 21-годишен осомничен. Според неофицијални информации, настаните започнале кога младиот човек го повикал татка си од клубот „ЛокалПатриот“, тврдејќи дека група луѓе му се закануваат и го замолил да дојде да го земе. Таткото, познат угостител, веднаш пристигнал. Штом излегол од автомобилот, група мажи од ромската заедница го нападнале, нанесувајќи му сериозни повреди на главата. Брзата помош успеала да го реанимира на местото на настанот, но неговата состојба била исклучително критична и бил однесен во болница. И покрај напорите на лекарите, мажот починал вчера кратко пред 22 часот.

По извршен увид на местото на злосторството и интензивна истрага, детективите вчера попладне го идентификуваа, лоцираа и уапсија 21-годишниот осомничен. Поради тековната истрага, полицијата во овој момент не објавува дополнителни детали и ќе го извести надлежното државно обвинителство.

Премиерот Голоб објави на социјалните мрежи во текот на ноќта дека чувствува највисока должност да ја обезбеди безбедноста на сите граѓани.

„Вчерашниот настан нè потресе сите. Изразувам искрено сочувство до семејството на починатиот и роднините, како и солидарност со целата заедница“, напиша и додаде дека бара јасни одговори и конкретни мерки од надлежните. „Насилството не се случува преку ноќ. Се раѓа во средина каде што казната не го следи делото, каде што правдата се одложува и каде што одговорноста ја губи својата смисла“, рече премиерот кој по денешната средба со министрите, полицијата и судот ќе оди во Ново Место за да се сретне со локалната заедница и да се запознае со мерките на терен.

Претседателката Наташа Пирц-Мусар се повика на Уставот и побара вонредна седница на Народното собрание за да се разговара за безбедносната состојба во југоисточна Словенија. Таа нагласи дека е неприфатливо таква трагедија да се искористи за добивање политички поени.

„Ни треба трезвена, професионална и одговорна дебата што ќе донесе ефикасни решенија“, соопшти нејзината канцеларија. Пирц Мусар остро го осуди нападот и изрази сочувство до семејството на починатиот. „Очекувам надлежните органи да дејствуваат брзо и ефикасно против сторителите. Не смее да има место за насилство од каков било вид во нашето општество“, рече таа. Таа ја повика владата да дејствува итно, истакнувајќи дека локалните заедници претходно предложиле решенија кои не биле доволно имплементирани. „Претставниците на ромската заедница мора да преземат одговорност за своите постапки. Законодавството, на крајот на краиштата, е исто за сите и мора да биде ефикасно за сите“, рече претседателката Пирц-Мусар.