Најмалку 44 лица се повредени, од кои едно потешко, откако патнички воз излета од шините во северниот дел на Франција, соопштија локалните власти. Меѓу повредените, 18-годишна девојка со хеликоптер и во критична состојба била префрлена во болница.

Министерот за транспорт Филип Табаро рече дека 180 патници се наоѓале во возот што сообраќал на релација меѓу Руен и Каен во Нормандија. Тој додаде дека 140 пожарникари и други служби за итни случаи биле распоредени на терен по несреќата во петокот навечер, во близина на општината Клеон, јужно од Руен.

Причината за излетувањето засега не е позната. Локалните власти активираа план за интервенција при несреќи со голем број настрадани веднаш по настанот, што се случил нешто пред 20 часот по локално време. Според објавените фотографии и извештаите на француските медиуми, патниците го напуштале оштетениот воз, при што три вагона се превртеле.

Францускиот државен железнички оператор СНЦФ соопшти дека има значителни нарушувања во сообраќајот на линиите во тој регион и дека ќе бидат обезбедени автобуси како замена. Властите упатија апел до граѓаните да ја избегнуваат оваа област.